Kosning utan kjörfundar í sendiráði Íslands í London

Utankjörfundaratkvæðagreiðsla vegna forsetakosninga þann 1. júní 2024 fer fram 2. maí til 31. maí. Í umdæmislöndum sendiráðs Íslands í London fer utankjörfundaratkvæðageiðsla fram í sendiráði Íslands í London og hjá kjörræðismönnum Íslands í Bretlandi, Írlandi og Möltu.

Sendiráðið vekur sérstaka athygli á eftirfarandi:

• Kjósendur bera ábyrgð á að koma atkvæði sínu á réttan stað. Hægt er að setja bréfið í póst, eða afhenda það einhverjum sem kjósandi felur að koma því til skila. Samkvæmt upplýsingum frá Royal Mail taka póstsendingar til Íslands 3 til 5 daga og telst sendingardagur þá ekki með. Sendiráðið hvetur kjósendur til að gera ráð fyrir hugsanlegum töfum á póstsendingum og senda atkvæði sín tímanlega.
• Kjósendur verða beðnir að gera grein fyrir sér, t.d. með framvísun íslensks skilríkis með kennitölu eða með öðrum hætti sem kjörstjóri metur fullnægjandi.
• Kjósendur geta kannað hvort og hvar þeir eru á kjörskrá með því að fletta upp kennitölu sinni á vef Þjóðskrár.

Hægt verður að kjósa í sendiráðinu á venjulegum opnunartíma virka daga í maí frá klukkan 9:00 - 16:30 mánudaga til fimmtudaga, og 9:00-16:00 föstudaga. Auk þess verður hægt að mæta í sendiráðið laugardaginn 11. maí frá kl. 11:00 - 14:00 og miðvikudaginn 15. maí frá kl. 9:00 - 19:30.

Þau sem vilja kjósa hjá kjörræðismönnum Íslands eru beðin um að hafa samband við sinn nálægasta kjörræðismann, og mæla sér mót með góðum fyrirvara.